Ferdinand “Bongbong” Marcos Jr.: Masamang balita. INQUIRER FILE
Kahit anong gawin ng mga Marcos, hindi nila mabubura ang katotohanan. Hindi nila matatabunan ang nakaraan. Hindi nila mababago at mababaluktot ang kasaysayan.
Gaano kadami man ang pera mula sa yamang dinugas nila sa bayan ang ibuhos sa panloloko at panlilinlang, lalabas at lalabas din ang katotohanan.
Binaboy at binalasubas ni Ferdinand Marcos ang Pilipinas noong dalawang dekadang nasa poder siya.
Nilapastangan ang dangal ng sambayanang Pilipino.
Nagpasimuno ng garpalang pagnanakaw.
Namuno sa walang-hiyang pambubutangero.
Nagsimula at nagpa-udo ng walang-awang paggamit ng dahas, ng torture, ng hamletting, ng water cure, ng panggagahasa sa mga mamamayang naglakas loob na tumutol sa kanyang rehimen.
Mas naging malinaw at mas naging matingkad na ang katotohanang ito. At kaya mas lumalakas ang mga pwersang humaharap sa kawalanghiyaan ng mga Marcos, ang kilusang kulay rosas ni Leni Robredo at Kiko Pangilinan.
At sino ang kinakalaban nila?
Isang kandidatong niyayakap, pinagmamalaki, pinagyayabang ang kasaysayan ng diktador na tinaguriang isa sa pinaka corrupt na lider sa kasaysayan.
Isang kandidatong walang pakundangan sa pagsisinungaling. Biruin ninyong ang Oxford University na nga mismo ang nagsabi hindi siya nagtapos doon, pinagpipilitan pa ring graduate siya ng unibersidad.
Isang kandidatong patuloy at walang hiyang pinagtatanggol ang pandurugas at ang pambabalasubas sa sambayanang Pilipino sa ilalim ng isang diktador.
Isang kandidatong walang paggalang sa mamamayang Pilipino, na inaakala niya’y kayang kayang bilhin at lokohin, kayang kayang bolahin tungkol sa totoong nangyari noong panahon ng diktador.
Ang darating na eleksyon ay malaking pagsubok para sa sambayanang Pilipino. Pagpipilian ang dalawang kandidatong napakatingkad ang pagkakaiba.
Sa isang banda, isang kandidatong naging bahagi ng pwersang nambababoy ng dangal at kasaysayan ng Pilipinas.
At sa kabila, isang kandidatong naging simbolo ng pamumunong marangal at matiyaga, isang lider na lubos ang paggalang sa mga adhikain at pangangailangan ng karaniwang Pilipino.
Kinabukasan ng bayan ang nakasalang sa darating na eleksyon. At naipakita na ng maraming Pilipino sa malalaking pagtitipong kulay rosas ang kanilang pagasa at pagtitiwala sa pamumuno ng isang lider na itataguyod ang kapakanan ng sambayanan.
Dahil napakalinaw na pag hindi si Leni Robredo ang magwagi, hindi ganoon ang mangyayari.
Binababoy ni Bongbong ang sambayanang Pilipino. At mas lalo pang bababuyin kung malagay siya sa poder.
