Chinese President Xi Jinping (right) shakes hands with Philippines President Rodrigo Duterte prior to their bilateral meeting at the Belt and Road Forum in Beijing, China, on May 15, 2017. PHOTO: REUTER
Sa kasaysayan ng Pilipinas, talagang lubos na naiiba si Rodrigo Duterte.
Biruin ninyong dinudugas na ng Partido Komunista ng Tsina ang mga isang katapat lang ng Palawan ay nagpapahayag pa ang pangulo ng Pilipinas nang taos pusong pasasalamat.
Biruin ninyong binubutangero na ng mga militar ng Partido Komunista ng Tsina ang naghihikahos na mangingisdang Pilipino sa West Philippine Sea, ay walang hangganan pa ang pagmamahal ng presidente sa Malakanyang sa kanila.
Biruin ninyong niyuyurakan na ng Partido Komunista ng Tsina ang dangal ng mga Pilipino sa sarili nilang bansa ay napakatindi pa rin, napakalalim ng pagmamahal niya sa Partido Komunista ng Tsina.
“Meron tayong utang na loob na marami, pati iyong bakuna natin,” sabi ni Tatay Digong.
Talagang naka-jackpot ang Partido Komunista ng Tsina sa pangulo ng Pilipinas.
Napakabait. Napaka galang. Napaka mapagpakumbaba sa Paritdo Komunista ng Tsina. Isang ulirang kaibigan ng mga siga sa Beijing.
Talagang sobra sobra ang swerte ng Partido Komunista ng Tsina sa pangulo ng Pilipinas.
Kung ibang bansa, maski nga ang santo Papa, aba malulutong na mura ang pinapamudmod ni Digong. Kung mga naghihikahos na mga Pilipino na umangal nang kahit konti sa matinding paghihirap sa gitna ng pandemya, mumurahin niya at mamaliitin pa, at ipagmamalaki pa ang sarap ng buhay niya sa gitna ng krisis: “Kami dito, we’re enjoying the times of our lives.”
Pero sa Partido Komunista ng Tsina, wala kundi papuri. Wala kundi pagsamba. Walang hanggang pagsamba at pagmamahal.
Para sa Partido Komunista ng Tsina, isang tapat, isa siyang maaasahang kaibigan at kaalyado.
Hindi sila bibiguin. Hindi sila tatalikuran. Hindi sila tatanggihan. Laging ipaglalaban ang mga interes ng Partido Komunista ng Tsina. Laging itataguyod ang mga adhikain ng mga namumuno sa Beijing.
Hindi raw niya gusto ang digmaan. Hindi raw niya gusto ang gulo. Hindi niya gustong galitin ang mga namumuno sa Beijing, ang mga panginoon sa Partido Komunista ng Tsina.
Isa siyang tapat na alyado. Isa siyang matatag na kaibigan ng Partido Komunista ng Tsina. Isang walang kupas na tagasunod sa mga panginoon ng Beijing.
Talagang napakaswerte ng Partido Komunista ng Tsina kay Rodrigo Duterte.
