Philippine Justice Secretary Vitaliano Aguirre II. INQUIRER FILE
Seryoso ang sitwasyon sa Mindanao. Maraming namamatay na sundalo at mga mamamayan. Hindi malinaw kung paano masusugpo ang mga terorista. Laksa laksang hirap ang pinagdaraanan ng Marawi.
Pero anong ginawa ng Justice Secretary ng republika?
Nang-imbento ng kuwento tungkol sa mga miyembro ng gobyerno at oposisyon na pinagbintangan niyang sangkot sa kaguluhan. Tapos noong nabistong kabulastugan ang pinagsasabi, nag-imbento ng palusot at sinisi ang media.
Paano na lang ang sambayanang Pilipino kung sinungaling ang isang mataas na pinuno ng gobyerno?
Paano na lang ang mga sundalong nasabak sa labanan, silang naatasang ipagtanggol ang sambayanan sa mga pwersang malulupit?
Binastos na nga sila ng pangulo ng republika, na sinabing sige lang, laban lang kayo, at kung gusto ninyong mang-rape, okay lang sa kin, sagot ko kayo.
Tapos ngayon, isa pang opisyal na dapat sana ay nagbibigay ng gabay sa pakikipaglaban at sa kung paano makakamit ang tagumpay, puro pamumulitika ang pinagkaka-abalahan.
Humirit sa pambobola, manlilinlang sa panahong napakahalaga ng katotohanan at katapatan. At kahit nalantad agad ang kawalanghiyaan ng pagsisinungaling, naglakas loob pang ipilit ang mas garapal na kasinungalingan tungkol sa sinabi niya.
“Only that the media didn’t mention [my] repeated precautions that [I have] yet to fully verify the truth of the reported incident,” sabi ni Vitaliano Aguirre.
Isipin natin ang sundalong nasabak sa labanan. Ang daming mga tanong kung paano nagsimula ang labanan. Hindi lubos na malinaw kung paano nakaposisyon ang mga terorista sa syudad ng Marawi.
Gobyerno sana dapat ang magbibigay ng linaw, ang makakahanap at makakapag alay ng mga sagot para matulungan sila sa pag unawa sa kaaway na kinakaharap nila.
Aanhin nila ang kasinungalingan? Paano sila matutulungan ng walanghiyang pambobola?
Seryosong usapan ang digmaan sa Mindanao. Pero anong naririning ng mga sundalong nasa gitna ng digmaan. Pambabastos sa kanilang dangal mula sa pangulo. Pagsisinungaling mula sa punong tagataguyod ng batas sa bansa.
Visit the Kuwento page on Facebook.
